Si Nou Dan En Demokrasi Alor Akoz Kanpany Parti Lepep Ek PDM, i Dir Ou Pou Ganny Viktiize Si ou Pa Al vote!!

Problenm

Napa en lasanble nasyonal savedir napa reform, si nou mazin byen pou lasanble nasyonal ganny dizourd sa famez vot sorti kot ex kandida SNP Madanm Jane Carpin ki an se moman kandida parti Mouvman Demokratik Popiler pou distrik Au Cap kot zot lider osi I sorti dan parti SNP Imsye David Pierre kin fasilit tousala.

Ki sis a la Demokrasi??

La demokrasi senpleman pli bon fason ki en nonm pei I servi pou met an fors e pou respekte drwa en nenport ki endividi dan son pei.

Ou drwa pou;  laliberte e lekspresyon.

Ou drwa pou rasanble dan lape e proteste ou mekontantman.

Ou drwa pou resevwar e donn lide lo diferan kalite kestyon.

Ou drwa ou annan propriete.

Ou drwa pou annan en louvraz e en saler akseptab pou soutenir  ou lavi avek lasante.

Ou drwa pou ledikasyon.

Ou drwa pou laliberte non pa lesklavaz.

Ou drwa pou liberte avek sekirite personnel.

Ou drwa pou prosedir lalwa onnet.

Ou drwa pou  en lavi prive.

Ou drwa pou laliberte konsyans.

Ou drwa pou asosye.

Ou drwa pou laliberte e mouvman lib san ganny menase.

Ou drwa pou proteksyon egal.

Ou drwa pou tretman lasante adekwat.

Ou drwa pou annan en lozman.

Ou drwa pou annan en travay.

E drwa pou bann zenes annan en fitir dan zot pei.

Drwa bann dezabilite pou ganny swen neseser pou vin prodiktiv kot I posib.

An plis ki sa nou dir  ankor……………………………

Kestyon?

Eski nou pe viv dan en demokrasi Sesel?

Eski nou santi nou an sekirite Sesel?

Eski nou annan en swen lasante ek ledikasyon adekwat Sesel?

Eski  nou tou pe ganny sans annan propriete ouswa en lozman dan Sesel?

Eski nou lavi prive pe ganny respekte dan Sesel?

Finalman eski nou bann zenes ek bann ki annan dezabilite pe ganny lasistans apropriye pou vin prodiktiv e annan en lavenir dan Sesel?

Solisyon

Pou demokrasi ganny enplimante fodre pei I revwar serten lalwa ki pan ganny revise depi tranzisyon parti inik pou vinn dan milti parti. Pou fer sa fodre nou annan en lasanble nasyonal ki pa reakte zis dan lentere legzekitiv en pei.

Alor fodre ki gouvernman I enplimant la demokrasi non kondisyonel!!

Boycott

Parti Lepep dan dernyen eleksyon prezidansyel ti fer en viktwar 23 distrik  e lopozisyon ti ganny zis 2 distrik, konplent lo konportman e vyolasyon bann lalwa elektoral ti ganny met an plas par bann ki ti konteste eleksyon prezidansyel 2011 kan bann ki ti ganny ekskli dan sa eleksyon ti deside pou boycott e rod en rekour kot lakour zidisyer Sesel.

Le senp rezon donnen par bann ki pa ti partisipe sete ki tro bokou lalwa pa ti an konfor avek tranzisyon parti inik pou milti parti. An tou I annan 21 sa bann lalwa. Pou kasyet e pa enplimant reform parti lepep ti deside ki zot pou koteste en nouvo parti apele Mouvman Demokratik  Popiler ki son formasyon ti ganny fer dan zis 7 zour  kot menm komisyon elektoral ti konpromiz zot non parti  ki an se moman ti PDP (Popular Democratic Party), kot en konsern e konplent sorti kot Nouvo Parti Demokratik (NDP) ti fder referans ki lalwa elektoral I dir ki si non en parti I tonm parey pou en lot e kapab kre konfizyon I pa pou ganny aksepte.

Me ki nou ti war se sa nouvo komisyon electoral menm sit inn pas antraver reform sorti lofis komisyoner electoral ki an se moman apre reform I konteni senk manm pa ti war sa konman en konfizyon anvi ki zot ti bezwen anrezistre PDM o pli vit posib. Tou sa in montre ki napa lendepandans menm si sa sipoze reform in pran lefe.

Parti Lepep pe pas zot letan zis senm konfizyon e konfirmen ki la demokrasi dan Sesel in fini ganny met dan zarden State House anba sa menm lakwa ki ti ganny zete Trwa Frer letan Albert Rene ti pran pei avek zarm. Premyerman zot pe dir ek dimoun ki nou pou konnen si oun pann vin vote,  e nou pou met ou lo “Blacklist” pou lasistans loan, lakaz, tretman medikal aletranze, ledikasyon avanse  e labours, menm posibilite pou ganny en lanplwa kid an sekter piblik ou prive.

Gouvernman I dir ki Sesel I annan demokrasi savedir nou devret annan bann lenstiti kip e fonksyonn endepandan avek leta, alor ki manyer en komisyon electoral I kapab pran ou drwa sakre si oun vote ouswa non e konpromiz zot lekor pou donn avek gouvernman pou fasilit viktimizasyon lo lekel kin vote  e lekel ki pan vote “ komisyon elektoral I merit sanz zot bann advertisman lo SBC pou dir ki ou vot sa sekre alor nou pa dan en demokdrasi”.

Si gouvernman o pouvwar I le ki son pep I viv konman I devret dan en demokrasi sa bann reform I merit ganny fer o pli vit posib.

Ki pou arive avek eleksyon parlmanter si ou reste se ou?

Parti Lepep I bezwen ki dimoun I desann pou vin vote akoz I bezwen montre lemonn ki la kantite I reflekte rezilta ki zot anvi gannyen. Me si ou reste se ou, menm si parti lepep I deside fer trik dan bwat vote la realite pou reste ki sa ki noun war e sa ki noun tande I diferan, alor parti lepep I napa lot swa me pou fors Seselwa mazorite ki posib pou desann e vin vote, ki swa ou a gat ou vot ou donn li enn ant le de kontestan.

Ler ou pa pou desann an nonm pou al vote parti lepep pou bezwen fer fason ki sa rezilta  eleksyon parlmanter I pa met an dout  dernyen rezilta eleksyon prezidansyel, alor an tou legois zot pou kapitaliz lo la kantite vot kin desann e les David Pierre ek parti PDM flot dan vid. Sa I a fer ki dernyen solisyon parey parti Laliberte Sesel pe demande kot en latab ronn I ganny fer  kot tou parti politik ek endividi endepandan I zwenn pou dyalog e rezourd sitiasyon pou enplimant reform pou nou ganny le vre demokrasi Sesel.

Bann alegasyon kot vot I ganny trike bwat I ganny sanze pa pou marse si ou pa desann  pou vote akoz  kantmenm bann obzervater parey “SADC” ek “Citizens Democracy Watch Seychelles” I la zis pou obzerve, sa ki  zot ekri dan zot rapor I pou reflekte sa ki zot inn war dan zot lizye. Sa I a fer ki  menm si SBC pou esey kouver la realite ki inevitab lefe pou reste  ki konsyans bann obzervater  I pou kler.

Kominote enternasyonal e bann lenstiti konsernen kip e swiv bann deroule pou sa eleksyon 2011 de pres Sesel I okouran ki I annan bann menas viktimizasyon si ou pa al vote e pe tret sa avek priyorite pou ekspoz e demanti nou gouvernman letan zot dir nou annan la transparans e demokrasi Sesel.